Қирғизистоннинг «Кабар» миллий ахборот агентлиги «Ўзбекистонда 2024 йилда ҳудудий инвестиция дастури доирасида умумий қиймати 11,6 миллиард доллар бўлган 7656 та лойиҳани амалга ошириш режалаштирилган» сарлавҳали мақолани тарқатди, деб хабар қилмоқда «Дунё» АА мухбири.
«Ўзбекистон иқтисодий ўсишнинг асосий тамойилларидан бири бу республика ҳудудларининг ижтимоий-иқтисодий ҳолатини чуқур таҳлил қилиш натижаларига асосланган ҳудудий ривожланишнинг кенг миқёсда ва параллел равишда амалга оширилиши ҳисобланади. Бунда ҳудудларнинг ресурс базаси, ишлаб чиқариш, транспорт-логистика салоҳияти юқори қўшимча қийматга эга бўлган турли хил маҳсулотларга талаб ўрганилади», — дейилади мақолада.
Ўзбекистон Инвестициялар, саноат ва савдо вазирлиги маълумотида қайд этилишича, ҳар йили ўтказиладиган таҳлилларга кўра амалга ошириладиган ҳудудий инвестиция дастурлари (ҲИД) шакллантирилади ва Ҳукумат комиссиясининг қарори билан тасдиқланади. Янги имкониятларни аниқлашни ҳисобга олган ҳолда, лойиҳалар рўйхати йил давомида кенгайтириб борилади.
Нашрда таъкидланишича, сўнгги йилларда мамлакатда қабул қилинган инвестиция дастурларининг характерли тенденцияси маҳсулот сифатини кескин ошириш, ишончли иқтисодиётга хос бўлган қўшимча қийматни шакллантириш, қўшимча иш ўринлари яратиш мақсадида миқдорий кўрсаткичлардан воз кечишдир. Ушбу тенденция жорий йилдаги ҳудудий инвестиция дастурларида ҳам ўз аксини топди.
«Ҳудудий инвестиция дастури доирасида умумий қиймати 11,6 миллиард доллар бўлган 7656 та лойиҳани амалга ошириш режалаштирилган. Ўтган йили деярли икки баравар кўп, яъни 14120 та лойиҳа амалга оширилди, уларнинг умумий қиймати 8,3 миллиард долларни ташкил қилди», — деб хабар қилган агентлик.
Ҳар бир лойиҳани амалга ошириш жараёни алоҳида, мураккаб вазифа бўлиб, унинг доирасида Инвестициялар, саноат ва савдо вазирлигининг Ишчи гуруҳлари томонидан ҳудудларда тизимли равишда ўрганиш ишлари олиб борилиб, лойиҳа ташаббускорларини бевосита манзилли қўллаб-қувватламоқда.
Натижада биргина 2024 йилнинг январь ойидаёқ 466 та лойиҳа ишга туширилди. Юқори шижоат билан иш бошлаганлар кучли учлигидан Қашқадарё (67 та лойиҳа ёки вилоятдаги лойиҳалар рўйхатининг 10,7 фоизи), Жиззах (20,9 фоиз ёки 65 та лойиҳа) ва Сурхондарё (10 фоиз ёки 45 та лойиҳа) вилоятлари жойлашган.
«ҲИД лойиҳаларини амалга оширилиши, ишлаб чиқариш ва экспорт ҳажмини сезиларли даражада ўсиши ҳамда Ўзбекистоннинг барча ҳудудларида 220 мингдан ортиқ кишини иш билан таъминлаш имконини беради», — деб ёзган «Кабар ».