Етакчи оммавий ахборот воситалари вакиллари ҳамда Энергетика вазирлиги ва унинг тизим ташкилотлари матбуот котибларининг Хитойга пресс-тури ташкил этилди. Тадбирда, шунингдек, Ахборот ва оммавий коммуникациялар агентлиги ҳамда Экология вазирлиги вакиллари ҳам иштирок этмоқда.
Президент топшириғига мувофиқ ташкил этилган пресс-тур қатнашчилари ХХРнинг Пекин, Сиан ва Ченду шаҳарларидаги энергетика тизими корхоналари фаолияти билан яқиндан танишишмоқда.
Биринчи объект Пекин шаҳридаги «China Energy International Co. LTD» корпорацияси бўлиб, у 2011 йилда ташкил этилган. Унинг дунёдаги 140 давлатида фаолият кўрсатувчи бўлинмасида 100 мингдан зиёд ходим ишлайди. Умумий активи - 154 млрд. АҚШ доллари.
Мутахассисларнинг таъкидлашича, бугунга қадар компания томонидан умумий 1060 ГВт қувватли 300 дан ортиқ лойиҳа йўлга қўйилган.
Ўзбекистонлик журналист ва матбуот котиблари компаниянинг электр станцияларини лойиҳалаштириш, қуриш ҳамда уларга хизмат кўрсатишга доир тажрибаси билан танишишди. Шу билан бирга, уларга иссиқлик электр станциялари ва гидроэлектр станциялари қаторида қуёш, шамол ва атом электр станциялари каби «яшил» энергетика манбаларини қуриш ва сақлаш борасидаги имкониятлари ҳақида батафсил маълумот берилди.
Қайд этилишича, «Чина Энергй Интернатионал Cо. ЛТД» Ўзбекистоннинг бир неча ҳудудида қайта тикланувчи энергия манбалари йўналишида умумий қиймати 2 млрд. 450 млн долларга тенг лойиҳаларни амалга оширмоқда.
Жумладан, компания Сирдарё вилоятида барпо этилаётган замонавий электр станцияси қурилишида бош пудратчи сифатида иштирок этаётган бўлса, Каттақўрғон туманида тўғридан-тўғри инвестиция ҳисобига энергиясамарадор цемент заводини ишга туширди. Бундан ташқари, Бухоро ва Қашқадарё вилоятларида қуввати 500 МВт бўлган икки қуёш электр станциясини қурмоқда.
Ушбу станцияларнинг дастлабки қуввати 2023 йилнинг 27 декабрида умумий тармоққа уланди ва бугунга келиб Ўзбекистон энергетика тармоғига экологик тоза «яшил» энергия етказиб бермоқда.
Шу билан бирга, Навоий вилоятида қуввати 600 МВт бўлган гибрид электр станциясини (қуёш, шамол ва электр энергиясини сақлаш тизими) қуриш лойиҳасини амалга оширмоқда.
Бундан ташқари, Тошкент, Фарғона, Андижон ҳамда Наманган вилоятлари ҳудудида 8 та электр энергиясини сақлаш тизимларини қуриш лойиҳаси рўёбга чиқариляпти.
Пресс-турдан Хитой Халқ Республикаси энергетика тизими, унда қўлланилаётган илғор технологиялар ҳамда рақамлаштириш жараёни билан танишиш мақсад қилинган.
