Лукашенко ва Трамп учрашуви "йирик келишув"га боғлиқ

Беларус президенти Александр Лукашенко икки давлат ўртасида "катта шартнома" тайёрланганидан сўнг Доналд Трамп билан учрашишга тайёрлигини билдирди.

"Биз келишувга тайёрмиз, аммо у ҳам АҚШ, ҳам Беларус манфаатларини акс эттирадиган тарзда тайёрланиши керак", — деди Лукашенко Россиянинг RT телеканалига берган интервьюсида.

Март ойида Трампнинг вакили Жон Коул Беларус президенти тез орада Вашингтонга ташриф буюриши мумкинлигини айтган эди. Бу ташриф инсон ҳуқуқлари бузилиши ва урушда Путинни қўллаб-қувватлагани сабабли кўп йиллар давомида "яккаланган" етакчи учун катта ўзгариш бўлиши мумкин. Александр Лукашенко интервьюда Минск Ғарб санкцияларига мослашганини ва Қўшма Штатлар билан ҳар қандай келишув фақат санкцияларни бекор қилиш билан чекланиб қолмаслиги кераклигини таъкидлади.

"Бизда ҳал қилиниши керак бўлган масалалар кўп ва бу жиддий шартнома мавзусидир. Қуйи даражада ҳаммасини келишиб олганимиздан кейин, Трамп билан учрашиб, шартномани имзолашга тайёр бўламиз", — дея қўшимча қилди у.