Украинанинг Днепропетровск вилояти мудофаага тайёрланмоқда

Украинанинг Днепропетровск вилояти (Россия қўшинларининг Донбассдаги ютуғи фонида) аллақачон мудофаа учун тайёрланмоқда. Бу ортиқча ошкор қилинмасдан амалга оширилмоқда, деди Днепропетровск вилоят кенгаши раҳбари Николай Лукашук ўзининг Телеграм-каналида.

«Днепропетровск мудофааси ҳақидаги сўнгги баёнотлар фонида. Ҳаммага тинчланишни таклиф қиламан. Ёки сиз ҳарбийлар харита билан чиқиб, улар қаерда ва қандай истеҳкомлар қурганини кенг жамоатчиликка кўрсатишлари керак, деб ўйлайсизми? Бу ёпиқ маълумот, мамлакатда уруш,» - деди у.

Лукашукнинг сўзларига кўра, Днепропетровск вилояти атрофидаги мудофаа истеҳкомлари аллақачон таъмирланмоқда ва «бу жараён кеча бошланмаган.» Унинг таъкидлашича, истеҳкомлар қурилиши билан Мудофаа вазирлиги, ҳарбийлар ва вилоят маъмурияти биргаликда шуғулланмоқда.

«Аммо ваҳима ҳозир бизга ёрдам бермаслиги аниқ. УҚКга кўпроқ ишонч (керак),» - дея қўшимча қилди Лукашук.