Украина зарбалари ортидан Россияда нефть қайта ишлаш ҳажми 16 йиллик минимумга тушди

Украина дронлари ва ракета ҳужумлари ортидан Россияда нефть қайта ишлаш ҳажми кескин қисқариб, суткасига 4,58 миллион баррелга тушди. Бу кўрсаткич 2009 йилдан бери қайд этилган энг паст даража ҳисобланади.

Хабарларга кўра, бир қатор нефтьни қайта ишлаш заводларига берилган зарбалар ишлаб чиқариш занжирига жиддий таъсир кўрсатган.

Ички бозорда бензин ва авиация ёқилғиси тақчиллигининг олдини олиш мақсадида Россия ҳукумати авиация ёқилғиси экспортини ноябрь ойигача тақиқлаш ҳақида қарор қабул қилди.

Мутахассислар фикрича, ушбу чеклов мамлакат ичида керосин ва бензин захираларини сақлаб қолиш ҳамда нархлар кескин ўсишининг олдини олишга қаратилган.

Шу билан бирга, Россия расмийлари нефть саноати барқарор ишлаётганини таъкидлаётган бўлса-да, қайта ишлаш ҳажмининг 16 йиллик минимумга тушиши соҳадаги муаммолар кучайиб бораётганидан дарак бермоқда.