Аввал хабар берганимиздек, Туркиянинг Анқара шаҳрида Туркий давлатлар касаба уюшмалари Ташкилотининг I Съезди бўлиб ўтди. Унда Туркий давлатлар касаба уюшмалари Ташкилотининг президенти ҳам сайланди.
Қабул килинган Устав қоидаларига биноан Ташкилотнинг аввалги сайланган раҳбар органлари аъзолари ва Президентининг ваколати тўла тугатилган деб ҳисобланиши боис Туркий давлатлар касаба уюшмалари Ташкилотининг президенти лавозимига Эргюн Аталай номзоди таклиф этилди. Мазкур номзод бўйича иштирокчилар ўз фикр ва мулоҳазаларини билдиргач, Туркия касаба уюшмалари Конфедерацияси ТУРК ИШ президенти Эргюн Аталай Туркий давлатлар касаба уюшмалари Ташкилоти президенти этиб сайланди.
Ўзбекистон касаба уюшмалари Федерацияси раиси – Туркий давлатлар касаба уюшмалари Ташкилотининг биринчи президенти Қудратилла Рафиков Ташкилотнинг фахрий президенти этиб сайланди.
Шундан сўнг Туркий давлатлар касаба уюшмалари Ташкилотининг вице-президентларини сайлаш масаласи кўриб чиқилди.
Биринчи вице-президентликка Озарбайжон касаба уюшмалари Конфедерацияси раиси Меҳбалиев Саттор Сулиддин ўғли номзоди таклиф этилди ва бир овоздан сайланди.
Ташкилот уставига биноан икки нафар вице-президент сайланиши лозим бўлгани ҳолда Туркий давлатлар касаба уюшмалари Ташкилотининг вице- президенти лавозимига Қирғизистон касаба уюшмалари Федерацияси раиси Эмиль Қызаев ҳамда Ўзбекистон касаба уюшмалари Федерацияси раисининг ўринбосари Бахтиёр Махмадалиев номзодлари таклиф этилди ва ушбу номзодлар мазкур лавозимга бир овоздан сайландилар.
Ташкилот биринчи вице-президентлигига захирага Турк ИШ Конфедерацияси бош котиби, Туркметалл касаба уюшмаси раиси Певрул Кавлак, вице президентликка захирага эса Ўзбекистон касаба уюшмалари Федерацияси раисининг маслаҳатчиси Ҳусан Эрматов, Қозоғистон Энергетика тармоғи касаба уюшмаси марказий кенгаши раиси Бекбас Оразбек Телбай ули номзодлари илгари сурилди ва бир овоздан сайланди.
Съезд давомида Ташкилотнинг Бош котиби ва унинг ўринбосарлари ҳамда уларнинг заҳира номзодлари ҳам сайлаб олинди.
Хусусан, Ташкилотнинг Бош котиби лавозимига Қозоғистон Республикаси касаба уюшмалари Федерацияси раиси Сатибалди Даулеталин, Бош котиб ўринбосарлигига Озарбойжон касаба уюшмалари Конфедерацияси раисининг ўринбосари Гасан Жафаров, Қирғизистон касаба уюшмалари Федерацияси раисининг ўринбосари Оморбек Арстанбеков ҳамда Ўзбекистон Энергетика, нефть газ ва геология ходимлари касаба уюшмаси республика кенгаши раиси Шуҳрат Қурбонов номзоди таклиф этилиб, мазкур лавозимларга бир овоздан сайландилар.
Бош котиб ўринбосарларига захира номзодлар сифатида Ўзбекистон касаба уюшмалари Федерациясининг Санатор-курортлар бошқармаси бошлиғи Анвар Аҳмедов, Озарбайжон касаба уюшмалари Конфедерацияси раисининг ўринбосари Агиль Дадашев, Туркия шахтерлар касаба уюшмалари кенгаши раиси Нуриддин Ақжул номзодлари таклиф этилиб, бир овоздан сайланди.
Шунингдек, 1-Съезд давомида Ташкилотнинг Назорат-тафтиш комиссияси сайлаб олинди. Уставга мувофиқ Назорат-тафтиш комиссиясига ҳар бир аъзо ташкилотдан бир нафардан аъзо ва бир нафардан захира номзодлар таклиф этилди. Хусусан, Назорат-тафтиш комиссияси аъзолигига Ўзбекистон касаба уюшмалари Федерацияси раисининг ўринбосари, Давлат муассасалари ва жамоат хизмати ходимлари касаба уюшмаси Республика кенгаши раиси Анваржон Абдумухторов, Туркия Толе иш касаба уюшмаси раиси Жамоил Бакинди, Озарбайжон Давлат муассасалари ва хизмат кўрсатиш ходимлари касаба уюшмалари Республика кенгаши раиси Ҳикмат Ўсманов, Қозоғистон Тоғ-кон ва металлургия саноати ходимлари касаба уюшмаси Республика кенгаши раиси Аслбек Нуралин, Қирғизистон Республикаси Агросаноат мажмуаси ходимлари касаба уюшмаси кенгаши раиси ЖеэнбекЎсмоналиев номзоди илгари сурилди. Мазкур номзодлар ушбу лавозимларга делегатлар томонидан бир овоздан маъқулланиб, сайландилар.
Ташкилот раислар кенгашидаги муҳокамалардан сўнг Назорат-тафтиш комиссияси раиси лавозимига Ўзбекистон касаба уюшмалари Федерацияси раисининг ўринбосари, Давлат муассасалари ва жамоат хизмати ходимлари касаба уюшмаси Республика кенгаши раиси Анваржон Абдумухторов номзоди таклиф этилди ва бир овоздан сайланди.