Трамп Теннессида амалга ошмаган қатлни «қизиқ вазият» деб атади

АҚШ президенти Дональд Трамп Теннесси штатида амалга ошмай қолган қатл жараёнини «қизиқ вазият» деб атади. Унинг сўзларига кўра, ўлим инъекцияси учун қўлланилган препарат кутилганидек таъсир қилмаган.

«Қизиқ вазият бўлди», — деди Трамп журналистларнинг воқеага муносабатини сўраган саволига жавоб берар экан.

Президент маҳаллий ҳокимият органлари билан маслаҳатлашиш кераклигини айтиб, ҳукм қайта ижро этиладими-йўқми, аниқ жавоб бермади. Унинг таъкидлашича, қатл жараёни «бунчалик мураккаб бўлмаслиги керак».

Теннессида ўлим жазосига ҳукм қилинган Криста Гейл Пайк икки марта ўлим инъекцияси қилинганига қарамай тирик қолган ва ҳозир оғир аҳволда экани хабар қилинди. Шундан сўнг штат расмийлари йил охиригача қатлларни тўхтатишга қарор қилган.

Пайкни қатл қилиш чоршанба куни Нэшвилл шаҳридаги Ривербенд юқори даражадаги хавфсизлик қамоқхонасида режалаштирилган эди. Бироқ қатлга бир соат қолганда АҚШ Олий апелляция судининг Олтинчи округи Пайк болалигида зўравонликка учрагани ҳақидаги далилларни кўриб чиқиш учун жараённи вақтинча тўхтатган.

Бир неча соат ўтиб, АҚШ Олий суди прокуратуранинг мурожаатини қаноатлантириб, кечиктириш қарорини бекор қилди ва ҳукмни ижро этишга рухсат берди.

Пайк 1995 йилда 19 ёшли Коллин Слеммерни ўлдиришда айбдор деб топилган. У Теннессида 200 йилдан ортиқ вақт ичида қатл этилган биринчи аёл бўлиши керак эди.