Трамп "қизил тугма"ни босди

Оқ уйнинг Овал кабинетидаги АҚШ президенти столидаги қизил тугма парҳез кола чақириш учун хизмат қилади.

Бу ҳақда АҚШ президенти Доналд Трамп Fox телеканали журналисти Лора Ингремга айтиб берди.
Трамп журналист аёл билан суҳбатлашаётиб, ўз столига яқинлашди ва қизил тугмани босди.

"Агар мен уни боссам, дунё ҳалокати юз беради, дейишади," деб айтди Трамп журналистнинг унга "кола тугмаси"ни кўрсатиш илтимосига жавобан. У Оқ уйга ташриф буюрувчилар бу тугмани ядровий қуролни ишга тушириш учун керак деб ўйлашларидан афсусланиб гапирди.

Доналд Трамп 20 январь куни АҚШ президенти лавозимига иккинчи марта қасамёд қилгач, Овал кабинетда ўзгаришлар киритди. The Wall Street Journal (WSJ) газетасининг хабар беришича, сиёсатчи, жумладан, парҳез кола буюртма қилиш тугмасини ўз столига қайтариб қўйган. 2021 йилда Жо Байден Трамп ўзининг биринчи президентлик муддати давомида ўрнатган тугмани Овал кабинетдан олиб ташлаган эди.