Трамп Путин билан бўлган суҳбати ҳақида гапирди

АҚШ президенти Доналд Трамп Россия раҳбари Владимир Путиннинг Эрон инқирозини ҳал қилишда воситачилик қилиш таклифига ҳозирча қизиқиш билдирмаганини маълум қилди.

"Мен кеча у билан гаплашдим. Биласизми, у воситачиликда ёрдам таклиф қилди. Мен эса аввал Россия-Украина масаласини ҳал қилишимиз кераклигини айтдим" — деди Қўшма Штатлар етакчиси.

Трамп, шунингдек, Россия ва Украинани "аҳмоқ" деб атади ва яна бир бор "Агар мен президент бўлганимда, Украина уруши ҳеч қачон содир бўлмасди", дея таъкидлади.

Кремл Путин ва Трамп ўртасида бўлган янги телефон суҳбати ҳақида маълумот бермади.

14 июн куни, Москва ва Вашингтон Путиннинг Трамп билан Яқин Шарқдаги вазиятнинг кескинлашуви юзасидан телефон орқали суҳбатлашганини билдирган эди.

"Суҳбат бир соатча давом этди, аниқроғи. Бу мазмунли, очиқ ва энг муҳими, жуда фойдали суҳбат бўлди", — деган эди Россия президентининг ёрдамчиси Юрий Ушаков.

Трамп эса 14 июн куни Truth Social тармоғида: "Путин бугун эрталаб менга қўнғироқ қилиб, туғилган куним билан табриклади, лекин бундан ҳам муҳими, биз Эрон масаласи ҳақида гаплашдик. Путин бу мамлакатни жуда яхши билади", — деб ёзганди. Трампнинг таъкидлашича, суҳбатда Украина масаласига анча кам вақт ажратилган.