Трамп келаси ҳафта Путинни Зеленский билан кўриштирмоқчи

АҚШ президенти Дональд Трамп келаси ҳафтада Россия президенти Владимир Путин билан учрашишни кутмоқда.

Бу ҳақда The New York Times манбаларга таяниб ёзмоқда.

Нашрнинг ёзишича, Трамп чоршанба куни Европа етакчилари ва Украина президенти Владимир Зеленский билан телефон мулоқоти чоғида ўз режаларини маълум қилган. Суҳбат чоғида Буюк Британия бош вазири Кир Стармер, Германия канцлери Фридрих Мерц ва НАТО бош котиби Марк Рютте, шунингдек, АҚШ вице-президенти Джей Ди Вэнс, Давлат котиби Марко Рубио ва Трампнинг махсус вакили Стив Уиткофф ҳам иштирок этди.

"Трамп Путин билан учрашишни ва тез орада Украина президенти Владимир Зеленский билан уч томонлама учрашув ўтказишни кутмоқда”, — дейилади мақолада.

Путин ёки Зеленский Трампнинг режасига рози бўлганми, ҳозирча аниқ эмас, деб ёзади газета.

Мақолада қайд этилишича, Трамп бир неча ой давомида Путинга музокаралар столига ўтириш имкониятини беришга ҳаракат қилмоқда. Аммо у яқинда Россия раҳбарини очиқчасига танқид қилиб, Уиткофф билан қайта-қайта суҳбатдан сўнг шунчаки вақт ютаётганини айтди.

Трампнинг махсус элчисининг Москвага сўнгги ташрифи Америка етакчиси Россияга тинчликка эришилмагани учун иккиламчи санкциялар қўллаш билан таҳдид қилган пайтга тўғри келди.