Трамп: Эрон учун «ҳал қилувчи тун» — цивилизация йўқолиши мумкин

АҚШ президенти Дональд Трамп Truth Social тармоғидаги баёнотида Эрон учун ҳал қилувчи тун яқинлашганини айтиб, бутун бир цивилизация йўқ бўлиб кетиши мумкинлигини маълум қилди.

Унинг сўзларига кўра, «бу кеча бутун бир цивилизация ҳалок бўлиши ва ҳеч қачон қайта тикланмаслиги мумкин». Шу билан бирга, Трамп бундай сценарийни истамаслигини, аммо бу эҳтимолдан ҳоли эмаслигини таъкидлаган.

Шунингдек, у «тўлиқ ва кенг қамровли режим алмашуви» натижасида Эронда «ақллироқ ва камроқ радикал кучлар» пайдо бўлиши мумкинлигини қайд этган. Трамп бу ўзгаришларни «инқилобий даражада гўзал» деб атаган.

Президент бу воқеаларни жаҳон тарихидаги энг муҳим паллалардан бири сифатида баҳолаб, яқин соатларда вазият ойдинлашишини айтган. Шунингдек, у Эрон халқига фаровонлик тилаган.

Баёнот Трамп томонидан берилган навбатдаги ультиматум муддати якунланаётган бир пайтда янгради. Унга кўра, Эронга Ормуз бўғозини очиш ва АҚШ билан келишувга эришиш учун вақт берилган эди.

Аввалроқ Теҳрон вақтинчалик сулҳ таклифини рад этган ва Покистон орқали доимий келишув шартларини ўз ичига олган 10 банддан иборат ҳужжатни тақдим этган. Шунингдек, 5 апрель куни Трамп Эрондаги электр станциялари ва кўприкларга зарба бериш билан таҳдид қилган эди.