Тошкентдаги III Марказий Осиё очиқ чемпионатида 9 мамлакат енгил атлетикачилари иштирок этмоқда

23–25 август кунлари Тошкент шаҳри минтақанинг енгил атлетика марказига айланади. III Марказий Осиё очиқ чемпионатига тўққиз мамлакатдан спортчилар ташриф буюрди. Ўз майдонида ўтадиган мусобақада Ўзбекистон шарафини 188 нафар атлет ҳимоя қилмоқда.

Уч кун давомида пойтахт стадионларида енгил атлетиканинг деярли барча турлари бўйича совринлар ўйналади. Мусобақа дастуридан спринт, ўрта ва узоқ масофаларга югуриш, тўсиқлар оша югуриш ва стипл-чез, узунликка, баландликка ва уч ҳатлаб сакраш, ядро ирғитиш, диск, босқон ва найза улоқтириш каби йўналишлар ўрин олган. Дастурнинг энг динамик ва томошабоп турларидан бири бўлган 4×400 метрга аралаш эстафета алоҳида эътиборга сазовордир. 23 ва 24 август кунлари спортчилар эрталаб ҳам, кечқурун ҳам стартга чиқмоқда. Финал беллашувлари 25 август куни эрталаб ўз якунига етади.

Чемпионатда иштирок этиш учун Ўзбекистон, Қозоғистон, Қирғизистон, Тожикистон, Туркманистон, Таиланд, Сингапур, Грузия ва Саудия Арабистони жамоалари ариза топширди. Энг йирик хорижий делегацияни Қозоғистон юборди. Унинг спортчилари кўплаб йўналишлар бўйича Ўзбекистоннинг энг кучли енгил атлетикачиларига рақобат кўрсатади.

Тошкентдаги Олимпия шаҳарчаси чемпионатнинг асосий майдонига айланди. 10 минг томошабинга мўлжалланган стадион турнир иштирокчиларига пойтахтнинг энг замонавий спорт майдонларидан бирида медаллар учун курашиш имкониятини беради. Айрим техник йўналишлар бўйича мусобақалар Ўзбекистон енгил атлетика федерацияси стадионида ўтказилмоқда.

Чемпионатнинг асосий ташкилотчиси Марказий Осиё югуриш ва юриш академияси. Турнирга тайёргарлик ишларида академия билан биргаликда Ўзбекистон ва Марказий Осиё спорт ташкилотлари иштирок этмоқда. Ташкилий ва ҳакамлар гуруҳлари таркибига ўзбекистонлик мутахассислар ҳамда халқаро ва минтақавий даражадаги экспертлар киритилган. Уларнинг тажрибаси мусобақани халқаро енгил атлетика турнирлари талабларига мувофиқ ташкил этиш имконини беради.

“Ёш атлетлар учун Тошкент чемпионати шунчаки медаллар учун кураш эмас, — дея таъкидлади Марказий Осиё югуриш ва юриш академияси директори Шуҳрат Усмонов. — Бу, айни пайтда, халқаро рақобат тажрибасини орттириш, спорт формасини синовдан ўтказиш ва кучли рақиблар сафида ўз даражасини билиб олиш имкониятидир. Мазкур турнир 2027 йилги енгил атлетика бўйича Осиё чемпионати ҳамда 2028 йилда Лос-Анжелесда бўлиб ўтадиган Олимпия ўйинлари каби йирик халқаро стартларга узоқ муддатли тайёргарлик босқичларидан бири бўлиб хизмат қилади”.

Тошкент минтақавий очиқ чемпионатни ўтказиш бўйича аллақачон муваффақиятли тажрибага эга. 2024 йилда Ўзбекистон терма жамоаси ушбу турнирда 69 та медални қўлга киритган эди: 18 та олтин, 28 та кумуш ва 23 та бронза. Бу галги чемпионатга ҳам мамлакатимиз турли ҳудудлардан кучли спортчиларни жамлади.

Янги чемпионат бу анъанани давом эттирса-да, унинг аҳамияти медаллар ҳисобидан анча юқори туради. Зеро, бу мусобақа спортчилар учун ўз аренасидаги халқаро рақобат, мутахассислар учун касбий тажриба алмашинуви, Тошкент учун эса Марказий Осиёнинг йирик спорт тадбирлари тақвимидаги ўрнини мустаҳкамлаш йўлидаги навбатдаги қадамдир.