Тошкентда таниқли блогер ўз уйида Нил тимсоҳини ноқонуний сақлаб келаётганлиги маълум бўлди (ВИДЕО)

Ижтимоий тармоқларда фуқаролардан бири Нил тимсоҳини уйида сақлаётганлиги акс этган видео тарқалди.

Ҳолат юзасидан Экология, атроф-муҳитни муҳофаза қилиш ва иқлим ўзгариши вазирлиги давлат назорат инспексияси ходимлари томонидан тезкор ўрганиш ишлари олиб борилди. Рейд давомида Тошкент шаҳрида яшовчи фуқаро яшаш манзилида 1 дона Нил тимсоҳини сақлаётганлиги аниқланди.

Маълумот учун, Вазирлар Маҳкамасининг "Ёввойи ҳайвонларни сақлаш тартибини такомиллаштириш чора-тадбирлари тўғрисида"ги 736-сон қарорига асосан, 2025 йил 1 январьдан жисмоний шахслар томонидан (рўйхат асосида) ёввойи ҳайвонларни тутқунликда сақлаш ҳамда цирк томошаларида ёввойи ҳайвонлардан фойдаланиш тақиқланди.

Тимсоҳ Тошкент ҳайвонот богъига топширилди. Ҳуқуқбузарга Маъмурий жавобгарлик тўғрисидаги Кодекснинг 92прим 1-моддаси 1-қисми билан маъмурий баённома расмийлаштирилди. Иш юзасидан тўпланган ҳужжатлар ҳолатга ҳуқуқий баҳо бериш ва тегишли чора кўриш мақсадида суд органларига юборилди.

Ушбу йўналишдаги экологик назорат тадбирлари барча ҳудудларда давом эттирилмоқда.