Бугун 16 ноябрь, 2026 йил, душанба

O'ZB

Тошкентда мактаб ўқувчилари ўртасида 7 та ҳомиладорлик ҳолати аниқланди

Тошкентда мактаб ўқувчилари ўртасида 7 та ҳомиладорлик ҳолати аниқланди

2026 йилнинг январь–сентабр ойларида Тошкент шаҳрида 15–16 ёшли қизлар ўртасида 7 та ҳомиладорлик ҳолати аниқланган. Бу ҳақда халқ депутатлари Тошкент шаҳар Кенгашининг 13 ноябрдаги қарорида маълум қилинган.

Ҳужжатда келтирилишича, 2025 йилнинг шу даврида ҳам мазкур ёш тоифасидаги қизлар ўртасида 7 та ҳомиладорлик ҳолати қайд этилган.

Ҳисобот даврида Тошкент шаҳрида 41 993 нафар тирик чақалоқ туғилган. Бу ўтган йилнинг мос давридаги 47 703 нафар кўрсаткичдан 5 710 тага кам. Шунингдек, икки йилгача оралиқда фарзанд кўрган аёллар сони 2 054 нафарни ташкил этиб, 2025 йилга нисбатан 133 нафарга ошган.

Бундан ташқари, 35 ёшдан катта аёллар томонидан 2 898 та туғруқ қайд этилган. Тўртинчи ва бешинчи фарзандини дунёга келтирган аёллар сони эса 3 149 нафарни ташкил қилган.

Қарорда 2026 йилнинг январь–сентабр ойларида оналар ўлими билан боғлиқ 5 та ҳолат қайд этилгани ҳам кўрсатилган. Ўтган йилнинг шу даврида бу кўрсаткич 6 тани ташкил этган.

Шунингдек, ҳужжатда 15–16 ёшли қизлар ўртасида ҳомиладорлик ҳолатларининг олдини олиш, бу борада таълим муассасалари, маҳаллалар ва оилалар билан профилактик ишларни ташкил этиш вазифаси белгиланган.

Киритилди: 23:24 14.11.2026. Ўқилди: 1224 марта. Фикрлар сони: 0 та.
telegram channel

Бўлимга тегишли қизиқарли хабарлар

Энг кўп ўқилган янгиликлар