Тошкентда банк карталаридан пул ўғирлаш билан шуғулланган кибержиноятчилар гуруҳи қўлга олинди. Бу ҳақда Ички ишлар вазирлиги Киберхавфсизлик маркази Тошкент бошқармаси матбуот хизмати маълум қилди.
Жиноятчилар Telegram мессенжери орқали тарқатилган зарарли apk файллар ёрдамида фуқароларнинг Android телефонларига кириб, улардаги SMS хабарлар, контактлар, қўнғироқлар тарихи ва бошқа шахсий маълумотларни қўлга киритган. Ушбу маълумотлар орқали улар банк карталарига кириб, маблағларни ўзлаштирган.
Аниқланишича, фирибгарлар вирус юқтирилган қурилмаларидаги SMS-тасдиқлаш кодларини кузатиб бориш имконини берувчи ёпиқ Telegram гуруҳ яратган. Улар ўз фаолиятини call-марказ орқали бошқариб келган.
Тергов давомида 177 та банк картасидан жами қарийб 1 миллиард сўм ўғирлангани аниқланган. Қўлга олинган жиноятчилар турли давлат фуқаролари экани айтилмоқда. Ҳозирда уларнинг республика ҳудудидаги бошқа шерикларини аниқлаш бўйича тезкор-қидирув тадбирлари давом этмоқда.
Мазкур ҳолат юзасидан Жиноят кодексининг 168-моддаси (фирибгарлик) асосида жиноий иш қўзғатилиб, гумонланувчилар ҳибсга олинган.
Дилшод Тўрахўжаев иши: Россия Ўзбекистонга нота йўллади
Машҳур блогер Абдурозиқ Дубай аэропортида ҳибсга олинди
"Германиянинг бирлашишига дарҳол рози бўлиб Горбачев хато қилган..."
