TikTok бош директори Трампнинг инаугурациясида иштирок этиши мумкин

TikTok бош директори Шоу Цзи Чу 20 январь куни АҚШнинг янги сайланган президенти Дональд Трампнинг инаугурация маросимида иштирок этишни режалаштирмоқда, дея хабар бермоқда Агензиа Нова.

Бу ҳақда New York Times газетаси махфий манбаларга асосланиб хабар берди.

Шоу Цзи Чу инаугурация маросимида собиқ президентлар, уларнинг оила аъзолари ва муҳим меҳмонлар билан бирга иштирок этиши кутилмоқда.

Тадбирда Meta бош директори Марк Цукерберг, Tesla ва SpaceX асосчиси ва бош директори Илон Маск, Amazon Group асосчиси ва раҳбари Жефф Безос ҳам иштирок этади.

Хитойнинг ByteDance компанияси TikTok бош директорининг маросимда иштирок этишини ҳали тасдиқламади. Бу TikTokнинг АҚШда дуч келаётган муаммолари билан боғлиқ. Платформа келаси якшанба куни Конгресс томонидан қабул қилинган ва президент Жо Байден томонидан миллий хавфсизлик юзасидан имзоланган қонунга мувофиқ АҚШ-да тақиқланиши мумкин.

Бироқ, The Washington Post нашрининг аноним манбаларга таяниб маълум қилишича, Дональд Трамп платформани “қутқариш”нинг бир қанча вариантларини, жумладан, қонуннинг амал қилишини 2-3 ойга вақтинчалик тўхтатиб туриш тўғрисидаги фармонни имзолаш режасини кўриб чиқмоқда.

Ўтган ой Трамп шунингдек, АҚШ Олий судини TikTokни тақиқлаш бўйича қарор чиқармасликка чақирди.