Президент ҳузуридаги Давлат хизматини ривожлантириш агентлиги Соғлиқни сақлаш вазирлиги масъул ходимлари учун семинар ташкил қилди.
Унда вазирлик Марказий аппарати, республика даражасидаги ихтисослаштирилган тиббиёт муассасалари, ҳудудий соғлиқни сақлаш бошқармаси ва туман (шаҳар) тиббиёт муассасалари, Санитария-эпидемиологик осойишталик ва жамоат саломатлиги қўмитаси, Фармацевтика тармоғини ривожлантириш агентлиги кадр бўлинмаси раҳбарлари ҳамда мутахассислари иштирок этди.
Йиғилишда тиббиёт муассасаларини hrm.argos.uz платформасига улаш масаласи муҳокама қилинди ва якуний хулосага келинган.
Унга кўра эндиликда вазирлик, унинг тизимидаги 1500 дан ортиқ ташкилот ва тиббиёт муассасаларида фаолият юритувчи 600 минг нафардан ортиқ ходимлар бўйича маълумотлар рақамлаштирилган ҳолда мазкур платформада юритилади, дейилади Давлат хизматини ривожлантириш агентлиги маълумотида.
