Теннессида ўлим жазосини ижро этишга уриниш муваффақиятсиз якунланди

АҚШнинг Теннесси штатида Криста Пайкга нисбатан ўлим жазосини ижро этиш уриниши муваффақиятсиз якунланди. 50 ёшли маҳбуса унга икки марта ўлим дозаси пентобарбитали юборилганига қарамай, тирик қолган.

Ҳодисадан сўнг Теннессидаги барча қатлларни 2026 йил охирига қадар тўхтатиш ҳақида қарор қабул қилинди.

Нэшвилл шаҳридаги Ривербенд қаттиқ тартибли қамоқхонасида ўтказилган процедура вақтида жиддий асоратлар юзага келган. Адвокатлар ва гувоҳ сифатида қатнашган журналистларнинг айтишича, препаратнинг биринчи ва иккинчи дозаси берилганидан кейин ҳам Пайк ҳушида қолган, оғир нафас олган ва инграган.

Қатлни амалга оширувчи ходимлар томирга катетер ўрнатишга қарийб бир соат уринган ва бунинг учун камида еттита игна ишлатилган.

Шундан сўнг Пайк оғир аҳволда қамоқхонадан ташқаридаги фуқаролик шифохонасига зудлик билан олиб кетилган.

Теннесси жазони ижро этиш департаменти ходимлар тасдиқланган протокол доирасида ҳаракат қилганини билдирди. Идорага кўра, амалдаги тартиб икки марта инъекция самара бермаган ҳолатда қўшимча чораларни назарда тутмайди.

Теннесси губернатори Билл Ли воқеа бўйича мустақил текширув ўтказишни буюрди. Шунингдек, декабрь ойига режалаштирилган бошқа маҳбуснинг қатли ҳам бекор қилинди.

1996 йилда қотилликда айбдор деб топилиб, ўлим жазосига ҳукм қилинган Криста Пайкнинг ҳимоячилари жазони умрбод қамоқ билан алмаштириш ҳақида расмий мурожаат билан чиққан.