Путин Украинадаги уруш қачон тугашини айтди

Россия президенти Владимир Путин Украинадаги уруш икки йилдан олдинроқ тугаши мумкин, деб айтди. У бу ҳақда «Валдай» халқаро муҳокама клубининг ялпи мажлисида сўзлаган.

Путиннинг айтишича, Украина Донбассни тахминан бир ярим йил ичида бой бериши мумкин, Европа Иттифоқи эса Киев яна икки йил қаршилик кўрсата олади, деб ҳисоблайди. Россия президенти эса «Менимча, биз тезроқ тугатамиз», деган.

Шунингдек, Путин Донецк вилояти ҳудудининг тахминан 11 фоизи ҳали Украина назоратида эканини айтган. Унинг таъкидлашича, Россия қўшинлари вилоят устидан тўлиқ назорат ўрнатишни Европа ва Киев тахмин қилаётган муддатдан олдин амалга оширишни режалаштирмоқда.

Путин Россия Украина бўйича тинчлик музокараларига тайёр эканини ҳам билдирган. Унинг сўзларига кўра, Москва узоқ муддатли тинчлик учун хавфсизлик кафолатлари ва муайян шартларни талаб қилмоқда.

Россия президенти Украинадаги можарони ҳал қилишда томонлар ўртасидаги йўқотишларни камайтириш ва тинчлик йўлларини излаш зарурлигини таъкидлаган. У рус тили ва черков масалалари ҳам музокараларда кўриб чиқилиши мумкинлигини айтган.

Путин, шунингдек, Россиянинг ҳарбий разведкаси бошқа давлатлар томонидан юзага келиши мумкин бўлган таҳдидларни кузатаётганини маълум қилган. У Россияга тўғридан-тўғри ҳужум қилинган тақдирда, мавжуд барча қуроллардан фойдаланиш масаласи «муқаррар ва зудлик билан» кун тартибига чиқишини айтган.

Россия президенти мамлакат ядровий кучларини ривожлантириш давом этаётганини ҳам билдирган. У Россия ядровий арсеналининг 98 фоизи замонавий эканини даъво қилди.

Путин дунё «ривожланишнинг ҳал қилувчи бурилиш нуқтасига яқинлашгани» ҳақида ҳам баёнот берган.