Сунъий интеллект етакчи олимлардан ҳам ақллироқ бўлиб бормоқда

Замонавий сунъий интеллект моделлари интеллектуал салоҳият бўйича етакчи олимлардан ўзиб кетмоқда ва офислардаги кўплаб вазифаларни мустақил бажаришга қодир. Бу ҳақда Абу-Дабида бўлиб ўтган халқаро энергетика конференциясида OpenAI раҳбари Сэм Альтман маълум қилди.

Унинг таъкидлашича, сўнгги бир йил ичида сунъий интеллект имкониятлари кескин даражада ўсди:

«Жорий йилнинг бошида СИ асосан энг ақлли олимларимиздан ортда қолаётган эди, энди эса аксарият ҳолатларда улардан устун келмоқда», — деди Альтман.

У, шунингдек, нейротармоқлар илгари фақат инсонлар томонидан бажарилган офис топшириқларининг салмоқли қисмини ўзига олаётганини қайд этди. Шунга қарамай, OpenAI раҳбари технологиялар ривожланиши инсоният ўрнига қарор қабул қилиш ҳуқуқини СИга топширишга олиб келмаслиги кераклигини уқтирди. Унинг фикрича, СИ инсонлар учун яратилган восита бўлиши ва уларга хизмат қилиши шарт.

Энергия танқислиги ва янги ҳамкорликлар

Соҳанинг кейинги ривожланишидаги асосий тўсиқ сифатида Альтман ҳисоблаш инфратузилмасининг электр энергиясига бўлган ортиб бораётган эҳтиёжини кўрсатди.

Шунингдек, у Бирлашган Араб Амирликлари ёшларининг қарийб 80 фоизи ҳар ҳафта ChatGPT хизматидан фойдаланишини маълум қилди. Конференция доирасида OpenAI БААнинг G42 технологик компанияси ҳамда ADNOC давлат нефть-газ корпорацияси билан ҳамкорликни эълон қилди. Мазкур ҳамкорлик доирасида ADNOC глобал миқёсда OpenAI’нинг илғор моделларини амалиётга жорий этадиган биринчи энергетика компаниясига айланади.