Собиқ футболчи Патрис Эвра ММАда дебют жангини эълон қилди ва рақиб сифатида Суаресни хоҳламоқда

"Манчестер Юнайтед"нинг собиқ футболчиси, 43 ёшли Патрис Эвра ўзининг аралаш жанговар санъатлар (MMA)даги дебют жангини эълон қилди.

У 23 май куни Парижда бўлиб ўтадиган PFL турнирида иштирок этади. Ҳозирча Патриснинг рақиби номи эълон қилинмаган, аммо у рақиб сифатида уругвайлик машҳур футболчи Луис Суаресни кўришни хоҳлашини айтди.

"Мен расман PFL'даги дебют жангим учун тайёргарлик кўряпман. Улар менга рақиб танлаб беришади. Улар ким билан жанг қилишни исташимни сўрашди ва мен "Луис Суарес!" деб жавоб бердим. Агар керак бўлса, бу жанг учун ўзим пул тўлашга ҳам тайёрман. У мени тишлаб ҳам олиши мумкин", — деди Эвра MMA Fighting нашрига.