Шифокор жинсий зўравонлик ва беморларни яширин кузатгани учун 35 йилдан 60 йилгача қамоқ жазосига ҳукм қилинди

Мичиганлик шифокор жинсий зўравонлик ва беморларни яширин кузатгани учун 35 йилдан 60 йилгача қамоқ жазосига ҳукм қилинди.

Бу ҳақда People журнали хабар берди.

Журналга кўра, 42 ёшли Умайр Эжазга нисбатан жиноий иш 2024 йилда унинг рафиқаси ўзи, болалари ва бошқа аёл қариндошлари акс этган яширин видео тасвирларни полицияга топширганидан сўнг қўзғатилган.

Тергов шуни кўрсатдики, шифокор шифохона хоналарига ҳам яширин камералар ўрнатиб, бу билан беморнинг шахсий ҳаёти тўғрисидаги қонунларни бузган ва шифокор лавозимини суиистеъмол қилган.

Юқоридаги айбловларга қўшимча равишда, Эжазнинг бир қанча беморлари касалхонада уларга жинсий тажовуз қилгани ҳақида судга даъво қилишган.

Журнал Окленд округи шерифи Майкл Бушарнинг сўзларидан иқтибос келтиради: "Мен судья Андерсоннинг ҳукм чиқариш қарорини ва прокурорнинг бу касал одамни тўлиқ жавобгарликка тортишга қаратилган ҳаракатларини олқишлайман".

Журнал Эжаз иши бўйича тергов ҳали ҳам давом этаётганига урғу беради.