Шахмат: сербиялик шахматчини мағлуб этган Абдусатторов энди Германия вакили билан куч синашади

Нидерландиянинг Вейк-ан-Зее шаҳрида шахмат бўйича анъанавий давом этаётган “Tata Steel Chess-2025” турнирининг кеча поёнига етган 10-тур ўйинлари ҳар жиҳатдан мураккаб кечди.

“Мастерс“ гуруҳида ғолибликка асосий даъвогарлардан бири, ҳамюртимиз Нодирбек Абдусатторов оқ доналарда сербиялик Алексей Сарана билан беллашди. Учрашув жуда мураккаб кечди. Ҳар икки шахматчи бир нечта юришларда хатоликларга йўл қўйди.

Шундай бўлса-да, Абдусатторов ўз салоҳиятини намойиш этиб, ортда қолган 9 та турнинг биронтасида мағлубиятга учрамаган Алексей Саранани таслим этди. Баҳсдан кейин журналистларга интервью берган Нодирбек ўйин ҳар жиҳатдан асабий кечганини, ушбу баҳсдаги иштироки турнирнинг энг ёмонни бўлганини айтиб ўтди.

Гуруҳда етакчилик қилаётган жаҳон чемпиони Гукеш Доммараджу нидерландиялик Макс Вармердам билан учрашувда омадли экани яна бир карра исботланди. Ҳиндистонлик шахматчи қора доналарда ҳаракатланди. Рақибининг 28-юриш ҳолатидаги қўпол хатолик Гукешнинг устунлигини таъминлади ва бу унга ғалабани тақдим этди.

Эртага, 31 январь куни ўтадиган 11-тур остонасида Макс Вармердамдан устун келган Гукеш 7,5 очко билан якка пешқадамликни сақлаб келаётган вазиятда Нодирбек Абдусатторов 7 очко жамғариб 2-ўринда бормоқда. 10-турда Словения шарафини ҳимоя қилаётган Владимир Федосеевни мағлуб этган ҳиндистонлик Рамешбабу Прагнанандха 6,5 очко билан кучли учликка якун ясаган.

“Челленжер“ гуруҳида иштирок этаётган Нодирбек Ёқуббоев 10-турда оқ доналарда нидерландиялик Бенжамин Бок билан куч синашди ва дурангга эришди. Бу эса ҳамюртимизга 5 очко жамғарган ҳолда турнир жадвалида 9-поғонага кўтарилишини таъминлади. Бир тур олдин у 10-ўринда бораётганди.

Эртага 31 январ куни ўтадиган 11-турда Нодирбек Абдусатторов қора доналарда германиялик Винсент Кеймер билан рўбарў келади. Турнир жадвали пешқадами Гукеш Доммараджу оқ доналарда хитойлик Вэй Ига қарши ҳаракатланади. 3-поғонани банд этган Рамешбабу Прагнанандха эса қора доналарда АҚШ вакили Фабиано Каруана билан кураш олиб боради.

“Челленжер“ гуруҳида ўз маҳоратини намойиш этаётган Нодирбек Ёққуббоев 11-турда аргентиналик Фаустино Оро билан куч синашади. Айтиш лозим, Ёқуббоевнинг рақиби ҳозирда 2,5 очко билан 14 нафар иштирокчи орасида 12-қаторда бормоқда.

“Челленжер“ гуруҳида чехиялик Ван Нгуен 7,5 очко билан 1-ўринда бораётган бўлса, нидерландиялик Эрвин Лами (7 очко) 2-ўринда, озарбайжонлик Айдин Сулейманли (6,5 очко) қўшимча кўрсаткичларга кўра 3-ўринни банд этган.

“Tata Steel Chess-2025” баҳслари 2 февралга қадар давом этади.