"Ўқишга кетяпман деб ўйлагандим..."

Жанубий Кореянинг "The Chosun Daily" нашри Украинада асирга олинган, Россия томонида жанг қилган Корея Халқ Демократик Республикаси (КХДР) снайпери билан суҳбат ўтказди.

Шимолий кореялик мерган Ри атиги 26 ёшда, аммо армияда 10 йилдан бери хизмат қилмоқда. У "ягона ўғил эканлиги ва оғир касал ота-онаси учун жуда хавотирда" эканини айтди: агар Пхенян унинг асирга тушганидан хабар топса, ота-онасини пойтахтдан бадарға қилишлари мумкин.

"Мени гўё ўқиш учун Россияга юборишди, оқибатда эса Курск яқинида жанг қилдик," - деди у.

Унинг КПАСОФ (Корея Халқ Армияси махсус операциялар кучлари) бўлинмаси Курск вилоятига юборилган. Унинг таъкидлашича, фақат воқеа жойига етиб боргандан сўнггина уларга жанговар ҳаракатлар бўлиши ҳақида хабар берилган. Рининг сўзларига кўра, таркибда 2500 га яқин шимолий кореялик аскар бўлган.

Инфрақизил сенсор туфайли ҳатто тунда ҳам нишонни аниқлай оладиган "шайтон дронлар"га қарши курашишга тўғри келган. Рининг хизматдошларининг аксарияти дронлар ва артиллерия зарбаларидан ҳалок бўлган. Рининг қўли ва жағи яраланган.

"Бизда дронларга қарши курашиш кўникмалари етишмади. Украина армиясидаги барча дрон операторлари Жанубий Корея аскарлари эканига бизни ишонтиришган эди," дейди Ри.

Жағ жароҳати туфайли Ри қаттиқ овқат ея олмайди. У рамён орзу қилади, лекин фақат бўтқа билан чекланишга мажбур. У оиласи учун хавотирда, аммо бошпана сўраб Жанубий Кореяга кетиш ҳақида ўйламоқда.

Рининг ишончи комилки, Шимолий Корея ташқи алоқаларни бузмаслик учун ўз иштирокини расман инкор этмоқда. Бироқ ҳақиқат шундай: "Мен билан келганларнинг деярли барчаси ҳалок бўлди. Мен ёлғиз қолдим."