Сербиядаги қариялар уйидаги ёнғинда саккиз киши ҳалок бўлди

Сербиянинг Велики-Борак шаҳридаги қариялар уйида 20 январга ўтар кечаси содир бўлган ёнғин оқибатида саккиз киши ҳалок бўлди.

Яна бир қанча жабрланганлар Белграддаги шифохоналарга етказилган. Ёнғинни ўчиришда кўплаб қутқарувчилар ва ўт ўчириш машиналари иштирок этди.

Ёнғин соат 03:32 да бошланган. Воқеа жойига етиб келган ўт ўчирувчилар ва қутқарувчилар умумий майдони 500 квадрат метр бинонинг 150 квадрат метр майдонида ёнғин содир бўлганлигини аниқладилар.

- Ёнғинда ҳалок бўлганлар устидан экспертиза тайинланди ва ушбу фожиа қандай шароитларда содир бўлганлигини аниқлаш бўйича кейинги чоралар кўрилмоқда. Ёнғинни уй турғунларидан бири қўзғатган, унинг ўзи жабрланган, деб тахмин қилишга асос бор, —дейилади Сербия прокуратураси баёнотида.

Сербия президенти Александр Вучич Давосда бўлиб, қариялар уйида ҳалок бўлганларнинг оила аъзоларига ҳамдардлик билдирди.

– Бараево яқинидаги қариялар уйида ҳалок бўлганларнинг оила аъзоларига ҳамдардлик билдираман. Бош прокуратуранинг тезкор жавобидан мамнунман ва полиция тергови якунланишига ҳам ишонаман.