Рютте: Москва ва Пекин биргаликда Ғарбни босим остида ушламоқчи

НАТОнинг янги Бош котиби Марк Рютте The New York Times нашрига берган интервьюсида Хитой Тайванга ҳужум қилса, бу ҳаракат олдидан Си Цзиньпин Россия президенти Владимир Путин билан келишиб олиши мумкинлигини билдирди. Унинг сўзларига кўра, Пекин Москвадан Европада тинчликни бузиш ва НАТО эътиборини чалғитишни сўрайди.

“Агар Си Цзиньпин Тайванга ҳужум қилишга қарор қилса, у аввал Москвага қўнғироқ қилади ва Путинга: ‘Мен бу ишни қиламан, сен эса Европадаги кучларни чалғит’ дейди”, — деди Рютте.

Рюттега кўра, бунақа сценарийнинг олдини олиш учун НАТО ўз позицияларини мустаҳкамлаши ва Индо-Тинч океани минтақасидаги шериклар билан алоқаларни кучайтириши зарур. У АҚШ НАТО мудофаасининг калит элементи бўлиб қолишини таъкидлади.

“Агар Атлантика, Европа ва Арктика хавфсиз бўлмаса, АҚШ ҳам хавфсиз эмас”, — дея қўшимча қилди НАТО раҳбари.

Путин Хитой раҳбари билан яқин муносабатда эканини бир неча бор таъкидлаган. 2024 йил декабрида уни «дўстим» деб атаган ва Москва-Пекин муносабатлари халқаро майдонда деярли ҳар доим мувофиқлаштириб борилишини айтган.

2025 йил июнида Санкт-Петербург халқаро иқтисодий форумида Путин:

“Россия ва Хитой ҳеч кимга қарши эмас. Бу табиий шериклик”, — деди.

Шунингдек, у Россия НАТОга ҳужум қилишни хоҳлаяпти деган ғояни “бемаъни гаплар” деб атаган:

“Россия НАТОга ҳужум қилмоқчи дейиш — ақлсизлик. Сизлар ақлдан озганмисизлар? Бутунлай аҳмоқмисизлар?” — деган эди у.

Financial Times манбаларига кўра, Хитой армияси 2025 йил май ойида ҳар қандай пайтда ҳаракатга ўтиши мумкин. Хитой Тайванни қуршаб олиш машқларини ўтказган, ҳаво кучлари, денгиз пиёда аскарлари ва реактив артиллерия тизимларини жойлаштирган.