Рубио: "Россия АҚШнинг Жанубий Кавказ мамлакатлари билан алоқаларининг кучайишидан мамнун эмас"

АҚШ Давлат котиби Марко Рубио Россия Жанубий Кавказда Америка иштирокининг кучайишига салбий муносабатда эканлигини айтди.

Рубио бу баёнотни Капитолийда бўлиб ўтган тингловда айтди.

"Шунингдек, мен таъкидламоқчиман - ва бу, менимча, очиқ манбалардан яхши маълум - руслар минтақадаги мамлакатлар билан фаоллашган алоқаларимиздан мамнун эмаслар", деди у.

Рубионинг сўзларига кўра, Вашингтон ва Ереван ўртасидаги ҳамкорликнинг кучайиб бораётгани фонида Москва Арманистондаги ҳозирги ҳукуматнинг сайловларда ютқазишини афзал кўришига ишониш учун асос бор.

У АҚШ Арманистон суверенитетини бузмоқчи эмаслигини ва унинг ташқи сиёсат қарорларига аралашмаслигини таъкидлади.

"Аниқлик учун: биз Арманистон суверенитетини бузмоқчи эмасмиз. Биз улардан бошқа давлатлар билан дўст бўлмасликни сўрамаяпмиз. Биз шунчаки улар билан нафақат тинчликка асосланган муносабатларни истаймиз. Тинчлик муҳим, аммо бу фақат бошланиши", деди Рубио.