Россия ҳарбийлари журналистлар қўним топган меҳмонхоналарни қасддан ўққа тутмоқда

"Чегарасиз мухбирлар" ташкилотининг маълумотига кўра, Россия ҳарбийлари журналистлар қўним топган меҳмонхоналарни қасддан ўққа тутмоқда.

Нодавлат ташкилот ҳисоботига биноан, 2022 йил 24 февралдан буён Россия қуролли кучлари Украинанинг 25 та меҳмонхонасига 31 марта ҳужум қилган. Ушбу меҳмонхоналар асосан фронт чизиғига яқин ҳудудларда - Харков, Донетск, Днепропетровск, Одесса ва Киевда жойлашган.

Ҳуқуқ ҳимоячиларининг таъкидлашича, мазкур меҳмонхоналарнинг фақат биттасидан ҳарбий мақсадларда фойдаланилган, қолганлари эса фуқаро меҳмонларни, шу жумладан журналистларни қабул қилган.

Меҳмонхоналарга қилинган ҳужумлар натижасида 25 нафар ОАВ ходими жабр кўрган, улардан еттитаси тан жароҳати олган. 2024 йилда Краматорскдаги меҳмонхонага уюштирилган ҳужум оқибатида Reuters ахборот агентлигининг хавфсизлик масалалари бўйича маслаҳатчиси Раян Эванс ҳалок бўлган.