Россия «чет эл агентлари» рўйхатини яна кенгайтирди

Россияда мамлакат Адлия вазирлиги томонидан юритиладиган «чет эл агентлари» реестри яна кенгайтирилди. Янги номлар орасида Украинанинг «Наш выход» жамоат ҳаракати, сиёсатчи Павел Елизаров, блогер Николай Росов, журналистлар Валерий Поташов ва Даря Литвишко, «Свободная Якутия» жамғармаси ҳаммуассиси Раиса Зубарева бор.

«Наш выход» ҳаракати бедарак йўқолган ёки асирга тушган россиялик ҳарбий хизматчиларни қидиради. Николай Росов Санкт-Петербург давлат университетининг тарих факултети битирувчиси, тарихий мавзуларда онлайн стримлар олиб боради. Раиса Зубарева вакили бўлган «Свободная Якутия» жамғармаси Якутия мустақиллиги тарафдори. 2023 йилда жамғарма ҳам «чет эл агентлари» рўйхатига киритилган.

Валерий Поташов — карелиялик журналист, 2022 йилдан — «Новая газета»нинг доимий муаллифи. Уч кун олдин ФСБ ходимлари «Револьт-Центр» иши доирасида унинг квартираси ва далаҳовлисида тинтув ўтказган.

Павел Елизаров марҳум россиялик мухолифат етакчиси, Россия Федерацияси ҳукумати раисининг собиқ биринчи ўринбосари Борис Немцовнинг собиқ ҳамкори. Даря Литвишко — РЗВРТ YouTube каналининг бошловчиси.

Россия Адлия вазирлиги маълумотларига кўра, уларнинг барчаси, жумладан, Россия Федерацияси ҳукумати қарорлари ва сиёсати ҳақида ёлғон маълумот тарқатган, хорижий ташкилотлар билан алоқа қилган, «чет эл агентлари» материалларини тарқатган ва «махсус ҳарбий операция» (Россиянинг Украинага қарши уруши) деб аталувчи амалиётга қарши чиққан.