Роналду сабаб "Ан-Наср" мураббийи ишдан кетиши мумкин

Стефано Пиоли «Ан Наср»дан кетиб, «Рома»га бош мураббий бўлиши мумкин.

Sportitalia маълумотларига кўра, италиялик мураббий Саудия Арабистони клубида айрим муаммоларга дуч келмоқда. Жумладан, у футболчилар билан яхши муносабатда эмас. Шунингдек, риёдликлар юлдузи Криштиану Роналду ҳам унинг ишидан норози.

Бу орада Пиолининг Италияга қайтишига оид гап-сўзлар кўпаймоқда. Унинг номи А Сериянинг бир неча клублари билан боғланган.

Ҳозирги вақтда мутахассиснинг ўзи «Рома» вариантини ўрганиб чиқмоқда. У мавсум охирида жамоадан кетишини маълум қилган Клаудио Раниери ўрнини эгаллаши кутилмоқда.

Айни вақтда «Ан Наср» Саудия Арабистони чемпионатида 3-ўринни эгаллаб турибди. Клуб 1-ўриндаги «Ал Иттиҳод»дан 10 очко, 2-ўриндаги «Ал Ҳилол»дан эса 6 очко ортда қоляпти.