«Реал» Винисиусни «Барселона»га қарши ўйиндаги ҳолат учун жазоламайди

Мадриднинг «Реал» клуби Ла Лиганинг 10-турида «Барселона»га қарши ўйинда алмашинув вақтида ўзини ножоиз тутгани учун ҳужумчи Винисиус Жуниорни жазоламасликка қарор қилди.

Учрашувнинг 72-дақиқасида бош мураббий Хаби Алонсо Винисиусни майдондан олганидан сўнг, бразилиялик футболчи жуда ғазабланган ҳолда тўғридан-тўғри кийиниш хонасига йўл олган ва мураббий билан қўл сиқишни рад этган. У майдонни тарк этаётганда ўзининг норозилигини очиқ билдириб, ҳатто:

«Мен жамоадан кетаман. Шундай бўлгани яхши. Ҳаммаси жонга тегди», — деган.

Бироқ Marca нашри маълумотига кўра, «Реал» раҳбарияти футболчига нисбатан жарима ёки бошқа интизомий чора кўриш ниятида эмас. Клубда бу масала жамоа ичида ҳал этиладиган вазият, деб баҳоланмоқда ва бу мураббий билан ўйинчи ўртасидаги ички муносабат сифатида қаралмоқда.

Маълум қилинишича, ўйиндан сўнг Винисиус ва Алонсо бир-бирини ғалаба билан табриклашган ва инцидент ёпиқ, деб ҳисобланмоқда.

Шу билан бирга, клуб ичида бразилиялик ҳужумчининг алмашинув вақтидаги хатти-ҳаракатидан мамнун эмаслар. «Реал»да бу ҳолат номуносиб деб баҳоланди ва Винисиус келгусида шундай вазиятлардан тўғри хулоса чиқариши кутилмоқда.