Рақобат қўмитаси такси нархлари бир неча баробар ошгани юзасидан ўрганиш бошлади

Ўзбекистон Рақобатни ривожлантириш ва истеъмолчилар ҳуқуқларини ҳимоя қилиш қўмитаси такси агрегаторлари хизматлари нархи ва улар фаолиятида инсофсиз рақобат аломатлари бор-йўқлигини ўрганишни бошлади. Бу ҳақда қўмита матбуот хизмати хабар берди.

Қўмита маълумотларига кўра, сўнгги кунларда йирик агрегаторлар ишидаги «техник носозликлар» фонида рақобатчи хизматларда тиғиз вақтларда йўл ҳақи бир неча баравар ошган. Бу жамоатчиликнинг асосли эътирозларига сабаб бўлган.

Ўрганиш давомида қўмита нархларнинг оширилиши қанчалик асосли экани ва рақобат тўғрисидаги қонунчиликка риоя этилаётганига эътибор қаратади.

Агрегаторларга йўл ҳақини белгилаш алгоритмларини қайта кўриб чиқиб, нархларнинг кескин ва сунъий оширилишининг олдини олиш тавсия қилинди.

Шунингдек, компаниялар қуйидаги чораларни кўриши керак:

• ҳайдовчилар ишлаб топган маблағларини ҳисобларига ўтказишда юзага келаётган носозликларни бартараф этиш;
• асоссиз равишда блокланган ҳайдовчиларни блокдан чиқариш;
• бажарилган буюртмалар учун белгиланган барча бонусларни қайта ҳисоблаб, тўлаш;
• компаниялар манфаатини кўзлаб иш юритувчи шахслар томонидан ҳам инсофсиз рақобатга йўл қўймаслик;
• ҳайдовчилар ва истеъмолчиларга хизмат кўрсатувчи техник ёрдам марказларининг кеча-ю кундуз узлуксиз ишлашини таъминлаш.
• «Рақобат муҳитидаги ҳар қандай ҳаракат истеъмолчилар манфаатларига зид бўлмаслиги, хизматлар нархи ва сифати эса адолатли ҳамда шаффоф тамойилларга асосланиши лозим», — дея таъкидлади қўмита.

Қўмита агрегаторлар рақобат тўғрисидаги қонунчилик ёки истеъмолчилар ҳуқуқларини ҳимоя қилиш талабларини бузгани аниқланса, текширув ўтказилиши ва қонунчиликда белгиланган чоралар кўрилишини маълум қилди.