Қозоғистон 2027 йил 1 июлдан бошлаб мамлакатга кирувчи айрим хорижий фуқаролар учун мажбурий электрон рухсатнома тизимини жорий этади. Янги талаб визасиз саёҳат қилиш ҳуқуқига эга бўлган бир қатор давлатлар фуқароларига ҳам тааллуқли бўлади.

Қозоғистон ҳукумати тасдиқлаган қоидаларга кўра, тизим Евроосиё иқтисодий иттифоқи давлатлари — Россия, Беларусь, Арманистон ва Қирғизистон, шунингдек, Қозоғистон билан визасиз саёҳат бўйича келишувларга эга мамлакатлар фуқароларини қамраб олади. Улар орасида АҚШ, Буюк Британия, Германия, Франция, Хитой, Япония, Жанубий Корея, Исроил, Бирлашган Араб Амирликлари, Ҳиндистон, Эрон ва Туркия бор.

Тизим босқичма-босқич жорий этилади:

• 2026 йил 1 ноябрдан — Ақтау халқаро аэропорти ва бир қатор автомобиль чегара назорат пунктларида;

• 2027 йил 1 январдан — Остона ва Олмаота халқаро аэропортларида;

• 2027 йил 1 мартдан — давлат чегарасини кесиб ўтишнинг бошқа барча пунктларида янги тартиб ҳақида маълумот берилади;

• 2027 йил 1 июлдан — электрон рухсатнома мажбурий бўлади.

Дастлабки босқичларда рухсатноманинг йўқлиги мамлакатга киришни рад этиш учун асос бўлмайди. Бироқ 2027 йил 1 июлдан кейин талабга тушадиган хорижликлар учун рухсатноманинг мавжуд эмаслиги чегарадан ўтказмасликка сабаб бўлиши мумкин.

Рухсатнома қандай олинади?

Ариза Қозоғистоннинг рақамли платформаси орқали режалаштирилган кириш санасидан камида 72 соат олдин топширилиши керак. Рухсатномалар бепул берилади ва 180 календарь кун давомида амал қилади. Мамлакатда қолишнинг рухсат этилган муддати эса фуқаролик ва амалдаги миграция қоидаларига боғлиқ бўлади.

Чегара назоратида рухсатнома олиш учун фойдаланилган паспорт ёки бошқа шахсни тасдиқловчи ҳужжат тақдим этилади. Рухсатнома мавжудлиги «Беркут» рақамли тизими орқали текширилади.

Кимлар рухсатномадан озод қилинади?

Қоидаларда истиснолар ҳам назарда тутилган. Жумладан, тегишли ҳужжатларга эга бўлган 16 ёшгача бўлган болалар ва 65 ёшдан катта шахслар, амалдаги Қозоғистон визаси ёки яшаш рухсатномаси бор хорижликлар, халқаро аэропортнинг транзит ҳудудидан чиқмайдиган йўловчилар, қочқинлар ва бошпана изловчилар айрим ҳолларда рухсатнома олишдан озод этилади. Расмий делегациялар, халқаро ташкилотлар вакиллари, транспорт экипажлари ҳамда гуманитар миссиялар иштирокчилари учун ҳам истиснолар белгиланган.

Ҳужжатда жами 29 та истисно тоифаси кўрсатилган.

Қарор 2026 йил 24 октябрдан кучга кириши белгиланган. Электрон рухсатномани олиш тартиби ва истисноларнинг аниқ шартларини сафардан олдин расмий манбалар орқали текшириш тавсия этилади.