Президент Шавкат Мирзиёевнинг асари Гарвард кутубхонасига тақдим этилди

Ўзбекистон делегациясининг АҚШга сафари доирасида Гарвард университети кутубхонасига давлат раҳбарининг инглиз тилида чоп этилган «Янги Ўзбекистоннинг “яшил” тараққиёт йўли» китоби топширилди.

Шунингдек, «Шавкат Мирзиёев – жаҳон миқёсидаги давлат ва сиёсат арбоби», «Мустақиллик зафарномаси» ҳамда «Янги Ўзбекистон: тинчлик, инсонпарварлик ва бағрикенглик диёри» китоб-альбомлари ҳам тақдим этилди.

Делегация таркибида Олий Мажлис ҳузуридаги Фуқаролик жамияти институтларини қўллаб-қувватлаш жамоат фонди, Барқарор ривожланиш маркази, Тошкент шаҳар хотин-қизларни қўллаб-қувватлаш маркази ва Халқаро Business Diplomat миссияси вакиллари бўлган.

Гарварднинг ноёб китоблар ва қўлёзмаларга ихтисослашган Хоутон кутубхонаси вакили Кристина Жейкобсон ушбу нашрлар халқаро илмий муҳитда Ўзбекистон ҳақидаги билимларни кенгайтиришга хизмат қилишини таъкидлади.