Португалиялик 19 ёшли ҳужумчи автоҳалокатда вафот этди

"Оливейренсе" ҳужумчиси Иван Мартинс автоҳалокатда вафот этди, дея хабар берди Португалия клуби матбуот хизмати.

Фожиа 21 март куни эрталаб содир бўлган. Португалиялик 19 ёшда эди.

"Оливейренсе" футбол клуби бугун эрталаб йўл-транспорт ҳодисаси қурбони бўлган жамоамизнинг 19 ёшгача бўлган футболчиси Иван Мартинснинг фожиали ўлими ҳақида чуқур қайғу ва катта ларза билан хабар беради," - дейилади клуб хабарида.

Мартинс 2024 йилнинг ёзида "Оливейренсе" футболчисига айланганди. Бунгача у Швейцариянинг "Янг Бойз" ёшлар жамоаларида ўйнаган.