Патрушев: Россия билан можаро юз берса, Польша икки-уч кунда йўқ бўлиб кетади

Польша ташқи ишлар вазири Радослав Сикорский Россия устидан ҳарбий устунлик ҳақида гапирар экан, Россия билан можаро юз берган тақдирда Польша икки-уч кун ичида йўқ бўлиб кетиши мумкинлигини англамаяпти. Бу ҳақда Россия президенти ёрдамчиси Николай Патрушев «Аргументы и факты» нашрига берган интервьюсида айтди.

«Бугун Сикорский ва Польша раҳбариятининг бошқа вакиллари гўёки Польша буюклигини тиклаётгани ҳақида гапирмоқда. Аслида эса улар соғлом бўлмаган амбицияларни қайта тикламоқда: “денгиздан денгизгача Польша”ни қайта барпо этиш, Россияга қарши “санитар кордон” яратиш ва Европани афсонавий “Россия таҳдиди”дан ҳимоя қилиш режаларини эълон қилмоқда», — деди Николай Патрушев.

Патрушевнинг қўшимча қилишича, Польша ташқи ишлар вазири «русофобик кайфиятда» тинч-тотув яшашни таъминлашни истамаяпти ва «тарихий хатоларни такрорламоқда».

Россия президенти ёрдамчиси Радослав Сикорский Владимир Путиннинг Россия Европага таҳдид солмаётгани ҳақидаги сўзларини эшитмаётганини ҳам таъкидлади.

Аввалроқ Радослав Сикорский НАТОнинг Россия ҳудуди яқинидаги ҳарбий машғулотлари жадаллигини оширишни таклиф қилган ва Польша авиация соҳасида Россиядан «яққол устунликка» эга эканини айтган эди.

Унинг сўзларига кўра, Варшава олти ҳафта ичида Россия нефтьни қайта ишлаш заводларининг ярмини йўқ қилиши, қолган ярмини эса «ишдан чиқариши» мумкин.

Россия ТИВ расмий вакили Мария Захарова Польша вазирининг бу баёнотларини «миядаги русофобия» деб атаган. Россия президенти матбуот котиби Дмитрий Песков эса Россия Калининград вилояти хавфсизлигини таъминлаш учун барча зарур чораларни кўраётганини билдирган.