Франция президенти Эммануэль Макрон Африкага сафари давомида қитъа давлатлари раҳбарларини Россия–Африка саммитида иштирок этмасликка кўндиришга уриниши мумкин. Бу ҳақда Россия ташқи ишлар вазири Сергей Лавров Украинадаги вазият бўйича элчилар иштирокидаги давра суҳбатида маълум қилди.

«Макрон жаноблари Африкага сафар қилди. Биздаги мавжуд фактларга асосланган шубҳаларимизга кўра, у африкалик дўстларимизни Россия–Африка саммитида иштирок этишдан энг юқори даражада қайтариш учун қўлидан келган барча ишни қилади», — деди Лавров.

Россия ташқи ишлар вазири Москва африкалик ҳамкорларини мустақил ва ўзини ўзи таъминлай оладиган давлатлар сифатида қабул қилишини таъкидлади. Шу сабабли Россия бундай усулларга мурожаат қилмаслигини билдирди.

Россия–Африка учинчи саммити 28–29 октябрь кунлари Москвада бўлиб ўтиши режалаштирилган. Форумда Россиянинг Африка давлатлари билан стратегик ҳамкорлигини мустаҳкамлаш, иқтисодий ва гуманитар алоқаларни кенгайтириш ҳамда кўп қутбли дунёда қўшма ташаббусларни илгари суриш масалалари муҳокама қилинади.