Оқ уй: "АҚШ Россия билан самарали музокаралар олиб бормоқда"

АҚШ ва Россия самарали музокаралар олиб бормоқда. Вашингтоннинг фикрича, Москва Россия-Украина можаросига барҳам бермоқчи.

Бу ҳақда Оқ уй матбуот котиби Кэролайн Ливитт журналистлар учун навбатдаги брифингда маълум қилди.

У АҚШ президентининг махсус вакили Стивен Уиткофф ва Россия етакчиси Владимир Путиннинг 11 апрель куни Санкт-Петербургда бўлиб ўтган учрашуви натижаларига изоҳ берди.

"Мен бу музокаралар натижаларини олдиндан баҳоламоқчи эмасман. Айтишим мумкинки, бу самарали суҳбат бўлди. Кеча Уиткофф айтганидек, у Россия бу урушни тугатишни хоҳлаётганига ишонади ва АҚШ президенти Дональд Трамп ҳам бунга ишонади", деди у.

Кэролайн Ливитт, шунингдек, АҚШ ўт очишни тўхтатгандан сўнг Россия билан иқтисодий ҳамкорлик ўрнатишга рухсат беришини маълум қилди.

"Россия бу можарога барҳам бериш учун рағбатга эга, бу АҚШ билан иқтисодий ҳамкорлик бўлиши мумкин. Лекин биринчи навбатда биз ўт очишни тўхтатишни кўрмоқчимиз", - деди у. Унинг сўзларига кўра, АҚШ президенти Дональд Трамп ва унинг махсус вакили Стивен Уиткофф “буни аниқ айтишган”.