Олий таълим тўғрисидаги низом янгидан тасдиқланди

Адлия вазирлиги Олий таълимга оид идоравий ҳужжатни давлат рўйхатидан ўтказди (рўйхат рақами 3807, 03.04.2026 й.).

🔰 Мазкур ҳужжат билан Олий таълим тўғрисидаги низом янгидан тасдиқланиб, унда олий таълим тизимини ташкил этиш, таълим жараёни, бошқарув, молиявий муносабатлар ҳамда талабалар ва педагог ходимларнинг ҳуқуқ ва мажбуриятлари белгиланди.

📝 Низомга кўра, олий таълим бакалавриат ва магистратура босқичлари орқали амалга оширилади.

⏳Бакалавриат таълими камида 3 йил давом этади.

✅ Ўқиш муддати кундузги таълим шаклига нисбатан:

▫️ сиртқи таълим шаклида камида 1 ўқув йили;
▫️ кечки таълим шаклида камида ярим ўқув йили муддатига кўпроқ бўлиши керак.

🗒 Олий таълим кундузги, масофавий, дуал, инклюзив таълим ва бошқа шаклларда амалга оширилади.

📁 Битирувчиларнинг меҳнат бозори талабларига мос бўлишини таъминлаш мақсадида ўқув дастурлари ва малака талаблари иш берувчилар билан ҳамкорликда ишлаб чиқилади.

▶️ Талабаларга қуйидаги ҳуқуқлар берилади:

➖ таълим сифатини ошириш бўйича таклифлар киритиш;
➖ таълим жараёнига оид муҳокамаларда иштирок этиш;
➖ кутубхона ва ахборот ресурсларидан бепул фойдаланиш;
➖ халқаро алмашинув ва қўшма таълим дастурларида қатнашиш;
➖ олий таълим ташкилоти раҳбарияти қарорлари устидан шикоят қилиш;
➖ меҳнат қонунчилигига мувофиқ меҳнат шартномаси асосида олий таълим ташкилотининг ўзида ёки бошқа ташкилотларда ишлаш;
➖ кундузги таълим шаклида ўқиётган талабалар стипендия олиш.

🚫 Олий таълим ташкилотларида талабаларни таълим олиш билан боғлиқ бўлмаган ишларга жалб этиш тақиқланади.

❇️ Талабалар олий таълим ташкилотларининг ички тартиб-қоидалари ва одоб-ахлоқ қоидаларига риоя қилишлари керак.

⏯️ Шунингдек, таълим жараёни миллий кредит-модуль тизими асосида ташкил этилиб, у Европа кредит трансфер тизимига мослаштирилади.

📑 Олий таълим ташкилотларига академик, ташкилий ва молиявий мустақиллик берилади.