Зеленский Киев вилоятига "Орешник" ракетаси зарба берганини тасдиқлади

Зеленский Киев вилоятига "Орешник" ракетаси зарба берганини тасдиқлади ва Россия расмийларини "ноадекватлик"да айблади – DW.

"Путин ҳатто "ура" сўзини ҳам нормал айта олмайди — дудуқланади, лекин ҳамон ўз ракеталари билан турар-жой биноларини енгмоқда. Россиянинг учта ракетаси сув таъминоти объектига қарата отилди, бозорни ёқиб юборди, ўнлаб турар-жой бинолари ва бир нечта оддий мактабларга зарар етказди. Белая Церков шаҳрига қарши ўз "Орешник"ини ишга солди. Ҳақиқатан ҳам ноадекват одамлар", — деб ёзди Зеленский ўзининг Telegram-каналида Россиянинг тунги ҳужумларига изоҳ берар экан.

Украина Қуролли кучлари Ҳаво кучлари маълумотларига кўра, Россия тунда мамлакат бўйлаб 90 та ракета ва 600 та дрон учирган. Киевда икки киши ҳалок бўлгани ва 56 киши яралангани маълум. Бир нечта турар-жой бинолари шикастланган, савдо маркази ёниб кетган. Киев вилоятида икки киши ҳалок бўлиб, тўққиз киши жароҳатланган.

Вилоят ҳарбий маъмуриятининг маълум қилишича, Белая Церков туманида "гараж кооперативи ва корхона бинолари шикастланган". Бундан ташқари, Черкасси шаҳрида дрон турар-жой биносига келиб урилиши оқибатида 11 киши жабрланган, деб хабар берди маҳаллий ҳокимият.

Россия Мудофаа вазирлиги Украинага "Орешник", "Искандер", "Кинжал" ва "Циркон" ракеталари билан зарба берганини тасдиқлади. Вазирлик буни Украинанинг "ҳарбий бошқарув объектлари", авиабазалари ва ҳарбий-саноат мажмуаси корхоналарига "жавоб зарбаси" деб атади. Россия Мудофаа вазирлиги зарба мақсадларига эришилгани ва белгиланган барча объектлар йўқ қилинганини даъво қилмоқда.