Нью-Йоркда уч қаватли бино тўлиқ қулаб тушди: ҳалок бўлганлар бор

Нью-Йоркда бино қулаб тушиши оқибатида ҳалок бўлганлар сони икки нафарга етди.

Нью-Йоркнинг Бруклин ҳудудидаги Флэтбуш туманида уч қаватли бино қулаб тушиши оқибатида икки киши ҳалок бўлган, яна 17 киши жароҳатланган. Жабрланганлар орасида етти нафар бола ҳам бор. Бу ҳақда Нью-Йорк ёнғин хавфсизлиги департаменти комиссари Лилиан Бонсиньоре матбуот анжуманида маълум қилган.

Унинг сўзларига кўра, ҳодиса оқибатида жами 19 киши жабрланган, улар орасида енгил тан жароҳати олган бир нафар ўт ўчирувчи ҳам бор. Жабрланганлардан 12 нафари барқарор ҳолатда, тўрт нафари эса оғир аҳволда.

Нью-Йорк ёнғин хизмати раҳбари Жон Эспозито қидирув-қутқарув ишлари ва вайроналарни тозалаш бир неча кун давом этиши мумкинлигини билдирган. Унинг таъкидлашича, бинo конструкциясининг беқарорлиги ва қўшни бинонинг ҳам қулаб тушиш хавфи ишларни қийинлаштирмоқда.

Эспозито вазият ўта беқарор эканини таъкидлаб, ҳудуд тўлиқ текширилиб, вайроналар остида бошқа жабрланганлар бор-йўқлиги аниқланмагунча қутқарувчилар воқеа жойида қолишини айтган.