Нью-Йоркда қизамиқ авж олгани сабаб фавқулодда ҳолат эълон қилинди

Нью-Йорк штати губернатори Кэти Хокул қизамиқ касаллиги тарқалаётгани сабабли штатда фавқулодда ҳолат эълон қилди. Йил бошидан 3 октябрга қадар штатда 108 та қизамиқ ҳолати қайд этилган.

Шундан 92 таси 15 июлдан кейин эмлаш даражаси паст бўлган қишлоқ ҳудудларида, 18 та округда аниқланган. Нью-Йорк шаҳрида 7 та, штатнинг бошқа ҳудудларида эса 101 та ҳолат қайд этилган.

Фавқулодда тартиб тиббиёт муассасалари ва тиббий хизмат кўрсатувчилардан қизамиқ, паротит ва қизилчага қарши ММР вакцинаси билан эмланганларнинг барча дозалари ҳақида 72 соат ичида штат ёки Нью-Йорк шаҳрининг эмлаш реестрларига маълумот киритишни талаб қилади.

Шунингдек, қизамиққа қарши эмлаш ҳуқуқига эга тиббиёт ходимлари доираси кенгайтирилди. 15 июлдан буён штатнинг қишлоқ ҳудудларида ММР вакцинасининг 1000 дан ортиқ дозаси қўлланган.

Қўшни Пенсильвания штатида ҳам қизамиқ тарқалиши кучайган. 2 октябрь ҳолатига кўра, у ерда 977 та ҳолат ва 5 та ўлим қайд этилган. Кейинчалик касалланганлар сони 1000 нафардан ошгани хабар қилинди.

АҚШ Касалликларни назорат қилиш ва профилактика марказлари маълумотига кўра, мамлакатда 1991 йилдан буён қизамиқ тарқалиши бўйича энг юқори кўрсаткич кузатилмоқда — қарийб 3900 та ҳолат қайд этилган.

Нью-Йоркдаги фавқулодда ҳолат режими 4 ноябрга қадар амал қилади.