2700 та мушукни ўғирлаб, гўшт сифатида қайта сотган жиноий гуруҳ қўлга олинди

Вьетнамда 2700 та мушукни гўшт учун ўғирлаган жиноий гуруҳ қўлга олинди.

Бангкок, 5 октябрь. — Вьетнамнинг Хошимин шаҳрида мушукларни ўғирлаб, гўшт учун сотиш билан шуғулланган жиноий гуруҳ фош этилди. Полиция 12 нафар гумонланувчини қўлга олган. Бу ҳақда VNExpress хабар берди.

Тергов маълумотларига кўра, гумонланувчилар Хошимин шаҳрининг турли ҳудудларидан мушукларни ўғирлаб, кейинчалик уларни гўшт сифатида қайта сотган. Қўлга олинганлар сўроқ жараёнида тахминан 2700 та мушукни ўғирлаб, сотганини тан олган.

Ҳуқуқ-тартибот идоралари жиноий гуруҳга 39 ёшли Лу Тхань Бинь раҳбарлик қилганини аниқлаган. Терговга кўра, у ўғирланган тирик мушукларни сотиб олиб, уларни Хошимин шаҳрининг Тхой Ан ҳудудидаги махсус жойда сақлаган ва кейинчалик гўшт учун қайта сотган.

Бинь, шунингдек, шаҳар четларида мушук ўғирлаш билан шуғулланган бир нечта гуруҳларни ташкил этиш учун шериклар жалб қилган етказиб берувчилар билан ҳамкорлик қилган.

Полиция жиноий тармоқни 8 июль куни Донг-Тхань коммунасида ўтказилган рейд давомида фош қилган. Амалиёт вақтида 50 та мушук, 55 та қопқон ва иккита тарози мусодара қилинган.

Мусодара қилинган ҳайвонларнинг 13 таси эгаларига қайтарилган. Қолган мушуклар эса эгаларини аниқлаш ишлари олиб борилаётган бир пайтда HAVEPAWS ҳайвонларни ҳимоя қилиш ижтимоий марказига топширилган.

Вьетнам ҳукумати яқинда мушуклари йўқолган фуқароларни полиция ёки HAVEPAWS марказига мурожаат қилиб, ҳайвонларини аниқлаш ва қайтариб олишга чақирди.

Вьетнам қонунчилигига кўра, ит ва мушуклар хусусий мулк ҳисобланади. Шу сабабли уларни ўғирлаш Жиноят кодексида мол-мулкни ўғирлаш билан боғлиқ жиноят сифатида баҳоланиши мумкин.