Nvidia $620 миллиард капитализацияни йўқотди

Nvidia $620 миллиард капитализацияни йўқотди – DeepSeek муваффақияти инвесторларни ташвишга солди.

Американинг сунъий интеллект учун чиплар ишлаб чиқаришга ихтисослашган Nvidia компанияси бир кун ичида $620 миллиард бозор қийматини йўқотди. Financial Times хабарига кўра, компания акциялари 17,8% га тушиб, Nvidia тарихидаги энг йирик капитализация йўқотишига сабаб бўлди.

Бунга Хитойнинг DeepSeek стартапи эришган ютуқлар асосий сабаб бўлди. Стартап камроқ харажат билан кучли сунъий интеллект моделларини яратиш мумкинлигини исботлади. Бу эса Microsoft ва Alphabet каби технологик гигантларнинг Nvidia каби чип етказиб берувчиларга қилаётган миллиардлаб доллар инвестициялари қанчалик ўзини оқлаши борасида шубҳа уйғотди.

Bloomberg маълумотига кўра, DeepSeek'нинг янги сунъий интеллект модели App Store рейтингида етакчига айланди. Бу эса технологик инновацияларни арзонроқ йўллар билан ҳам ривожлантириш мумкинлигини кўрсатди. Union Bancaire Privee компанияси бошқарувчи директори Вейсерн Линг DeepSeek муваффақияти йирик AI компанияларининг ҳозирги стратегияларини қайта кўриб чиқишга мажбур қилиши мумкинлигини таъкидлади.