Америкаликлар Зеленскийга бир соат вақт берди

Ўтган ҳафта Украина билан мамлакатни қўллаб-қувватлаш эвазига иқтисодий келишувни муҳокама қилиш учун Киевга ташриф буюрган АҚШ молия вазири Скотт Бессент президент Владимир Зеленскийга таклиф этилган битимни ўйлаб кўриш ва розилик билдириш учун атиги бир соат вақт ажратгани ҳақида The Economist нашриёти уч манбага асосланиб хабар бермоқда.

Суҳбатдошларнинг айтишича, Зеленский музокараларда молиявий ёрдамни давом эттириш масаласи кўтарилишини кутган, бироқ Бессент бунинг ўрнига АҚШга 500 миллиард долларлик камёб ер ости бойликларини қазиб олиш ҳуқуқини бериш ҳақида гап бошлаган.

Бундай тўғридан-тўғри муомалага кўникмаган Украина президенти таклифни рад этган. 14-16 февраль кунлари бўлиб ўтган Мюнхен хавфсизлик конференциясида Қўшма Штатлар яна "ҳарбий ёрдам эвазига қарзни узиш сифатида" Украина ресурсларини қазиб олишни назорат қилишни талаб қилган. 15 февраль, шанба куни кечқурун Украина делегацияси муддатни кечиктиришга эришиб, музокаралар жараёнини бошлашга розилик билдирган.

NBC News манбаларга таяниб хабар беришича, АҚШ Украинага жанг ҳаракатлари тугаганидан сўнг унинг ҳудудида хавфсизликни таъминлаш учун ўз қўшинларини жойлаштириш эвазига 50 фоиз камёб ер минералларини қазиб олишни таклиф қилган. The Washington Post газетаси ёзишича, бу ташаббус Европа дипломатик доираларида "ўта дадиллиги" ва Киевнинг уни кўриб чиқишга тайёрлиги туфайли норозилик уйғотган. Манбаларга кўра, Зеленский имзолашдан бош тортган ҳужжат катта халқаро келишув эмас, балки "Ню-Ёрк қонунчилиги асосида тартибга солинадиган" ўзаро англашув меморандуми бўлиб, ҳуқуқий кучга эга бўлмаган.

Украина ресурсларидан фойдаланиш Зеленскийнинг "ғалаба режаси" бандларидан бири бўлиб, уни АҚШдаги сайловлардан олдин Доналд Трампга тақдим этган эди. Шу билан бирга, президент Киев улар билан бепул улашиш ниятида эмаслигини, аксинча биргаликда ўзлаштиришни таклиф қилаётганини таъкидлаган.