Норин ГЭСлар кaскадининг дастлабки босқичи ишга тушди

Наманган вилоятида Норин дарёсида қурилаётган гидроэлектр станциялари кaскадининг биринчи босқичи ишга туширилди.

17 сентябр куни Президент Шавкат Мирзиёев Уйчи туманидаги иншоотни бориб кўрди. «Ўзбекгидроэнерго» томонидан амалга оширилаётган олти ГЭСдан иборат лойиҳанинг умумий қиймати 428 млн доллардан ортиқ бўлиб, йилига 1 млрд кВт/h дан кўпроқ электр энергияси ишлаб чиқариши кутилмоқда. Бу 430 минг хонадонни электр билан таъминлайди ва йилига 290 млн куб метр газни тежаш имконини беради.

Ишга туширилган ГЭС-1 тўлиқ маҳаллий материаллар ва ускуналар асосида қурилгани боис «биринчи миллий ГЭС» сифатида қайд этилмоқда. Станция йилига 171 млн кВт/h энергия ишлаб чиқариш қувватига эга бўлиб, 130 та янги иш ўрни яратилди.

Лойиҳа доирасида Ўзбекистон гидроэнергетикаси тарихида илк бор кичик босим шароитида ҳам самарадорлиги юқори бўлган горизонтал капсула шаклидаги гидроагрегатлар жорий этилди. Мутахассислар буни миллий гидроэнергетика соҳасида янги босқич деб баҳоламоқда.

ГЭС ҳудудида сув тўсиш иншооти, хизмат бинолари ва диспетчерлик пункти барпо этилди. Атроф-муҳитни асраш мақсадида 6 минг туп манзарали дарахт ўтқазилди, келгуси баҳорда яна 7 минг туп мевали кўчат экилиши режалаштирилган. Лойиҳа минтақа учун экологик аҳамиятга ҳам эга бўлади.

Қолган бешта станциянинг иккитаси 2026 йилда, учтаси эса 2027 йилда ишга туширилиши кутилмоқда. Умумий ҳисобда Наманган вилояти қуввати 2141 MWга етказилиб, йиллик 7,8 млрд кВт/h энергия ишлаб чиқарилади. Бу миқдор вилоят эҳтиёжини тўлиқ қоплаб, ортиқчаси Андижон ва Фарғона вилоятларига йўналтирилади.