Нетаньяху сайлов олдидан Тель-Авивга ядровий зарба берилиши тасвирланган суратни эълон қилди

Исроиль Бош вазири Биньямин Нетаньяху X (собиқ Twitter) ижтимоий тармоғидаги расмий саҳифасида Тель-Авив тепасида ядро портлаши акс эттирилган ва сунъий интеллект ёрдамида яратилган тасвирни жойлаштирди. Ушбу хабар Исроильда 27 октябрга белгиланган парламент сайловларига атиги икки кун қолганда эълон қилинди.

Нетаньяху суратга исроиллик ёзувчи ва сиёсий шарҳловчи Юваль Блумбергнинг матнини илова қилди. Унда Эрон ядровий қуролга эга бўлган тақдирда мамлакат мавжудлигига реал таҳдид туғилиши таъкидланади. Муаллиф Дональд Трамп президентлигининг қолган икки йилидан Эрон ядро дастурига қарши ҳарбий кампанияни якунлаш учун фойдаланиш зарурлигини қайд этган.

Бош вазир, шунингдек, Қатар томонидан молиялаштириш, ўзининг маслаҳатчиси Йонатан Урих атрофидаги можаролар ҳамда ультраортодоксларни армияга чақириш масалаларини жамоатчилик эътиборини Эрон таҳдидидан чалғитиш деб атади. У Эронга қарши тура олмайдиган сиёсатчининг сайланиши исроилликларни «иккинчи Холокост» хавфи остида қолдириши мумкинлигидан огоҳлантирди.