Исроил бош вазири Биньямин Нетаньяхунинг «Ликуд» партияси 27 октябрь куни бўлиб ўтган парламент сайловларида биринчи ўринни эгаллади. Бироқ сиёсий блокларнинг ҳеч бири ҳукуматни шакллантириш учун зарур бўлган кўпчилик овозга эриша олмади.
Бу ҳақда Исроил Марказий сайлов комиссиясининг барча бюллетенлар — 100 фоизи ҳисоблаб чиқилганидан кейин эълон қилинган дастлабки маълумотларидан маълум бўлди.
Эълон қилинган натижаларга кўра, «Ликуд» Кнессетдаги 120 та ўриндан 27 тасини қўлга киритган. Иккинчи ўринни Гади Айзенкот бошчилигидаги мухолифатдаги «Яшар» партияси эгаллаб, 21 та депутатлик мандатига эга бўлган.
«Ликуд» ҳамда Нетаньяхуни қўллаб-қувватловчи ўта ўнг ва диний партиялар блоки 53 та ўринни қўлга киритган. Мухолифат кучлари эса 48 та мандатга эга бўлган. Яна 19 та ўрин араб партияларига насиб этган. Уларнинг икки блокдан бири билан коалиция тузишда иштирок этиши эҳтимоли паст деб баҳоланмоқда.
Ҳукуматни шакллантириш учун камида 61 нафар депутатнинг қўллаб-қувватлаши талаб этилади.
Сайловнинг якуний натижаларини эҳтимолий апелляциялар кўриб чиқилганидан сўнг, 4 ноябрдан кечиктирмай эълон қилиш режалаштирилган.
Натижалар расман тасдиқланганидан кейин Исроил президенти Ицхак Герцог парламентдаги партиялар билан маслаҳатлашувлар ўтказади ва депутатлардан бирига ҳукуматни шакллантириш вазифасини топширади.
Одатда бундай топшириқ энг кўп овоз олган партия етакчисига берилади. Бироқ президент парламентда кўпчиликни шакллантира оладиган бошқа номзодни ҳам танлаш ҳуқуқига эга.
Биринчи номзодга коалиция тузиш учун 28 кун вақт берилади. Зарур бўлганда бу муддат яна икки ҳафтага узайтирилиши мумкин. Агар коалиция тузишнинг имкони бўлмаса, президент ваколатни бошқа депутатга топшириши мумкин. Унга эса муддатни узайтириш ҳуқуқисиз 14 кун вақт берилади.
Сунъий интеллект дунёдаги энг қиммат сурат муаллифлигини шубҳа остига қўйди
1-ноябрдан иссиқ сув ва иссиқлик энергияси нархлари 30% га ошади
Эстонияда асфальт тугади
