Нега Хитой Миср билан Туркияга қараганда фаолроқ иқтисодий ҳамкорлик қилмоқда?

Хитойнинг Миср билан иқтисодий алоқалари сўнгги йилларда жадал ривожланмоқда, Туркия билан муносабатларда эса Пекиннинг инвестиция фаоллиги кутилган даражага етмаган. Таҳлилчилар бу фарқни икки давлатнинг географик ўрни, сиёсий муносабатлари ва иқтисодий муҳити билан изоҳламоқда.

Хитой ва Миср ўртасидаги икки томонлама савдо ҳажми қарийб 20 миллиард долларга етган. Суэц канали иқтисодий зонасида Хитой инвестициялари иштирокида 200 дан ортиқ компания фаолият юритмоқда. Икки давлат марказий банклари ўртасидаги валюта своп келишуви ҳам Мисрда валюта тақчиллиги даврида қўлланилган механизмлардан бири бўлди.

Мисрнинг Хитой учун аҳамияти унинг стратегик жойлашуви билан ҳам боғлиқ. Мамлакат Суэц канали орқали Осиё, Европа ва Африка ўртасидаги муҳим савдо йўналишини назорат қилади. Шунингдек, Мисрнинг араб дунёси ва Африкадаги сиёсий таъсири Пекин учун муҳим омил сифатида кўрсатилмоқда.

Туркия билан савдо муносабатларида эса катта номутаносиблик мавжуд. 2025 йилда икки давлат ўртасидаги савдо айланмаси 53 миллиард долларни ташкил этган бўлиб, шундан 50 миллиард доллари Хитойдан Туркияга импорт, тахминан 3 миллиард доллари эса Туркия экспорти ҳисобига тўғри келган.

Анқара Хитойнинг «Бир макон, бир йўл» ташаббусида муҳим ўрин эгаллашга интилиб, Ўрта коридорни ушбу лойиҳа билан боғлашга ҳаракат қилмоқда. Бироқ таҳлилчиларнинг фикрича, бу ҳам Хитой инвестицияларини кутилган даражада жалб қилиш учун етарли бўлмаган.

Мутахассислар бу ҳолатда Туркиянинг инвестиция муҳити, Ғарб билан яқин алоқалари ва НАТО аъзолигини ҳам муҳим омиллар қаторида келтирмоқда. Миср эса Хитой ва АҚШ билан бир вақтда муносабатларни ривожлантириш имкониятига эга бўлган давлат сифатида кўрилмоқда.

Шу сабабли таҳлилчилар Хитойнинг Мисрга қизиқиши фақат инвестициялар билан эмас, балки Суэц канали, транспорт йўлаклари, минтақавий бозорлар ва Пекиннинг узоқ муддатли геоиқтисодий стратегияси билан ҳам боғлиқ эканини таъкидламоқда.