Моуриньо нима учун Криштиану Роналду "Фенербахче"га ўтмаслигини тушунтирди

"Фенербахче" бош мураббийи Жозе Моуриньо "Ан-Наср" ҳужумчиси Криштиану Роналду нима учун Истанбул жамоасига ўтмаслигини тушунтирди.

"Криштиану Роналду келмайди. Биринчи сабаб, менда учта жуда яхши марказий ҳужумчи бор ва менга ҳужумчи керак эмас. Криштиану доим Криштиану, лекин у менга керак эмас, чунки мен ҳужумчиларимдан мамнунман. Унинг Саудия Арабистонида топадиган пули ва мақсади бор. Уни Туркияга келишга Истанбулнинг гўзаллигидан бошқа нима ундайди?

Январдаги трансфер даври менга жуда ёқмайди, чунки келган футболчига маълум вақт керак. Мен ҳеч қачон трансферни рад этмайман, лекин раҳбарият эшигини тақиллатиб, трансферни хоҳлаётганимни айтмайман. Мен фақат ғалаба қозонишни хоҳлайман", - деди Моуриньо.

Аввалроқ ОАВда Моуриньо Роналдуга шахсан қўнғироқ қилиб, уни "Фенербахче"га таклиф қилгани ҳақида маълумот пайдо бўлганди.